ភ្នំពេញ៖ ជនបរទេសជាង១០០នាក់បន្ថែមទៀត ត្រូវបានអគ្គនាយកដ្ឋានអន្តប្រវេសន៍បណ្តេញចេញពីកម្ពុជាចាប់ពីថ្ងៃទី៣០ ខែវិច្ឆិកា ដល់ថ្ងៃទី០២ ខែធ្នូ ឆ្នាំ២០២២។
ជនបរទេសទាំង១០៤នាក់ ក្នុងនោះស្រី២៤នាក់ មាន៥សញ្ជាតិ ដោយជនជាតិវៀតណាមចំនួន៩៥នាក់ ចិនចំនួន៤នាក់ ឥណ្ឌាចំនួន២នាក់ អាមេរិកចំនួន១នាក់ និងឡាវចំនួន២នាក់។
ជនបរទេសទាំងនោះត្រូវបានបណ្តេញចេញពីកម្ពុជា តាមប៉ុស្តិ៍នគរបាល ច្រកទ្វារអាកាសយានដ្ឋានអន្តរជាតិភ្នំពេញ និងប៉ុស្តិ៍នគរបាលច្រកទ្វារព្រំដែនអន្តរជាតិព្រែកចាក ដោយអនុលោមតាមច្បាប់ស្តីពីអន្តោប្រវេសន៍។
ការបណ្តេញចេញជនបរទេសទាំង ១០៤នាក់នោះ គឺពាក់ព័ន្ធនឹងបទល្មើសលួចស្នាក់នៅ និងធ្វើការងារខុសច្បាប់ដែលល្មើសនឹងច្បាប់ស្ដីពីអន្តោប្រវេសន៍។ តាមច្បាប់ស្តីពីអន្តោប្រវេសន៍ ពួកគេនឹងគ្មានសិទ្ធិមកកម្ពុជារយៈពេល៣ឆ្នាំបន្ទាប់ពីបណ្តេញចេញពីកម្ពុជា។
គូសរំលឹកថា កាលពីថ្ងៃទី០៧ ដល់០៨ ខែវិចិ្ឆកា ឆ្នាំ២០២២ អគ្គនាយកដ្ឋានអន្តោប្រវេសន៍ ក៏បានបណ្តេញជនបរទេសចំនួន ១៣០នាក់ចេញពីកម្ពុជាផងដែរ៕
